Ömurlegt og æðislegt og fiskar og föstudagur

Já það sökkar ef maður þarf núna að fá noyjukast í hvert skipti sem maður notar kortið sitt...en mér er svo sem skítsama um það (eða svona...innan velsæmismarka). Langaði svona frekar að velta því upp hvaða nýbúi væri farinn að skrifa fréttir inn á mbl?

Fór svo næstum því út á sjó í gærkveldi. Sat í góðu chilli hjá Tótu þegar það hringdi í mig skip sem vildi bara fá mig einn tveir og þrír því þeir ætluðu að vera farnir af stað en einn gaurinn klikkaði og það lá eitthvað voða mikið á út af...veit ekki alveg, en orðið bræla kom fyrir (er það kannski bara vont veður?)....ég hef ennþá rétt á að vera svona heimsk - þarf ekki að vita alveg strax hvað fólk á við þegar það segir svona orð. Ég kann að segja "skip" og "veiða fisk" og það er bara nóg fyrir mig í bili. En ég er víst ennþá í hinni vinnunni svo ég varð að segja nei við því. Svo reyndar var þetta kl. 10 um kvöld eða eitthvað og ég á ekki einu sinni stígvél, hvað þá einhvern sjóvænan alklæðnað og hefði væntanlega ekki komist að kaupa hann í gærkveldi heldur. En allavega, ég var voða pirruð að missa af þessu þar sem ég veit ekki einu sinni hvern fjandann ég á að vera að gera hérna núna (og þess vegna biðst ég fyrirfram afsökunar ef það skyldi gerast að ég hafi ekkert betra að gera í dag en að blogga bara tóma steypu - skal reyna að láta flestar setningar vera um eitthvað) en svo var ég líka voða glöð því einhver ætlaði að taka mig með að veiða fisk...þó það væri í neyð. Svo nú er ég bara hætt við að verða atvinnulau aumingi. Kaupi mér bara einhvern geðveikan pollagalla (eða hvað sem það nú er sem maður á að kaupa og kalla það - held ég þurfi eitthvað að spyrja lillebror ráða) í dag og verð reddí hvenar sem er - eftir að ég er hætt hérna þ.e.a.s.

En í dag er ég víst samt að fara út á sjó, en með veiðistöng í staðinn fyrir...uuu...hitt dótið....því vinnan ætlar að skella sér í sjóstangveiði - eða allavega eitthvað fólk úr vinnunni og auðvitað læt ég mig ekki vanta í svoleiðis gjörning. Ég sem datt svo ærlega í það í grillveislunni um daginn af því það var nú einu sinni lokavinnudjammið mitt - en þetta verður þá bara svona loka loka. Ef það verður þá eitthvað djamm...kannski þetta verði bara healthy outdoors activities og enginn bakkus...en miðað við eins og hálfs árs reynslu mína af þessu fyrirtæki finnst mér það ekki líklegt - það er nú einu sinni föstudagur.

En nú er ég byrjuð að bulla - held ég hætti því í bili....bulla kannski meira á eftir. Hmm, mér sýnist að það sé föstudagur í hausnum á mér - er alltaf öllu vitlausari (og skemmtilegri?) þá en aðra daga.

Búnaður til að stela kortaupplýsingum fannst á sjálfsala

Detti mér nú allar dauðar....

Var að koma úr mat og það var pizza. Og ekki bara pizza, heldur Domino's pizza. Og ekki bara Domino's pizza heldur uppáhalds Domino's pizzan mín - Santa Fe. Voru þarna tvær sneiðar í felum inn á milli kassalaga heimabökuðu sneiðanna og ég nappaði þeim sko báðum. Enda ananas á hinni pizzunni svo annars hefði ég ekki fengið neitt.

Svo virðist það einhvern veginn hafa farið fram hjá mér að það er búið að taka upp fjögurra daga vinnuviku hérna á Grundartanga. Fannst voða gaman að sjá í morgun hvað það voru fáir bílar þegar ég kom - hugsaði með mér að það væri nú langt síðan ég mætti á undan flestum síðast. En svo bara kom fólkið ekkert og ég var eiginlega ein í mat (þeir fáu sem vinna áfram á föstudögum eru þeir sem eru svo busy að þeir fara aldrei í mat hvort eð er). Ég vissi svo sem af því að það væri verið að spá í þessu, en hvernig þetta fór svo alveg fram hjá mér er ofar mínum skilningi.

Og hversu fyndið er þetta máltæki - detti mér nú allar dauðar lýs úr höfði??? Fór eitthvað að spá í þetta rétt eftir að ég skrifaði fyrirsögnina og þegar ég var búin að pæla í nokkra hringi var ég eiginlega komin á það að ég hefði bara verið að skálda þetta en nú er ég alveg komin af þeirri skoðun. En er þetta ekki soldið út úr kortinu? Finnst fljúgandi-svína-jafngildi þess upp á enska tungu alveg mun eðlilegra. Voru Íslendingar virkilega svo lúsugir í gamla daga að það að lýsnar dræpust var talið álíka líklegt hér og að svín flygju í útlöndum?

Mótmælendur, helgin og ný byrjun

Oh þessir mótmælendur eru svo miklir bjánar. Í fyrsta lagi, hvað halda þeir að þeir geti stoppað úr þessu? Og í öðru lagi eru þetta allt svo miklar bavíanaaðgerðir að þeir koma óorði á náttúrverndarsinna og mótmælendur yfir höfuð svo maður fer ósjálfrátt að tengja slík áhugamál við greindarskort sem er þó engan veginn réttlátt.

Í öðrum fréttum er það helst að ég borðaði geðveikt góðan mat hjá Tótu á föstudagskvöldið og sofnaði svo í partíinu sem fylgdi og vaknaði ekki fyrr en Tóta og Nico voru búin að fara í annað partí og bæinn og voru komin heim til að reka mig úr rúminu sínu. Eftir það tókst mér ekki að sofna aftur svo ég horfði á barnatímann á RÚV á laugardagsmorgun í nýja fína sjónvarpinu mínu, en það gamla lagaðist einmitt af sjálfu sér sama dag og ég fékk það nýja svo nú er þetta gamla 28" bara til sölu eða eitthvað. Svo fór ég í Smáralindina eiginlega um leið og hún opnaði því mér leiddist og ég kann greinilega ekki að vera vakandi á laugardagsmorgnum. Þar settist ég niður á café adesso eða hvað það nú heitir með tölvuna mína og skrifaði ógeðslega langa og skemmtilega færslu um bæði föstudagskvöldið og sjónvarpið en ég var svo mikið fífl að mér tókst að láta tölvuna verða alveg batteríslausa svona sekúndu áður en ég ýtti á "vista og birta"-takkann svo hún hvarf. Af hverju ég var ekki löngu búin að ýta á "vista sem uppkast"-takkann veit ég ekki...ætli ég sé ekki bara fífl. Þar sem ég nenni ekki að skrifa sömu hlutina tvisvar er bara stutta og ófyndna útgáfan af föstudagskvöldinu og sjónvarpinu látin duga.

Við mamma skelltum okkur svo í bíltúr á Laugarvatn í smá heimsókn til Gogga frænda og co rétt eftir hádegi sem varð svo ekkert smá heimsókn. Eftir mikið spjall, kökuát og leik við hinn tæplega eins árs og ótrúlega krúttlega Brimi fórum við að spila Catan - landnemar, sem við mamma vorum að prófa í fyrsta skipti og vá hvað þetta er skemmtilegt spil. Svo var okkur bara boðið í kvöldmat (útigrillaður lax...mmmmm) og eftir mat var tekið annað spil og við mamma komum í bæinn um miðnætti. Þetta spil verður án efa næsta fjárfesting mín og þá verður sko enginn sem kemur í heimsókn óhultur...ég mun neyða fólk til að læra þetta og spila. Og þetta finnst mér þrátt fyrir að hafa eiginlega bara skitið á mig í bæði skiptin sem við spiluðum.

Þá er kannski komið að því að útskýra síðustu færslu aðeins. Síðasta prófið er í höfn og útskrift úr verkfræðideild í október verður að raunveruleika. Í tilefni af því ákvað ég að ég vil ekki vera verkfræðingur. Hef ekki nokkurn minnsta áhuga á þessum leiðindafræðum og hef aldrei haft og hvernig ég hef lifað þetta af í 5 ár án þess að lenda í neinu alvarlegu þunglyndi er ofar mínum skilningi. En um daginn fattaði ég loksins að þótt ég hafi asnast til að skrá mig í verkfræði í háskólanum fyrir 5 árum síðan þarf ég ekki að líða fyrir þá slæmu ákvörðun allt mitt líf - er langt frá því að vera of gömul til að breyta til. Og mikið er ég fegin að ég fattaði þetta núna en ekki eftir 20 ár. Þó að verkfræðingar haldi öðru fram, þá trúi ég því að það eigi að vera gaman í vinnunni og veit að það er til fólk sem finnst gaman í vinnunni svo ég bara ætla að stefna að því og fara í eitthvað nýtt og spennandi nám eftir ár. Í millitíðinni ætla ég að skella mér á sjó og veiða fisk sem er eitthvað sem mig langaði alltaf mikið til að gera þegar ég var unglingur en gerði aldrei. Og nei, ég er ekki að djóka eins og langflestir sem ég hef sagt frá þessu halda. Ætli ég sé ekki bara svona klikkuð.

Mótmælendur tóku yfir verkfræðistofu á Reyðarfirði

Allt í volli

Er þetta ekki eitthvað djók? Eða er ég að misskilja? Er virkilega verið að bjóða fólki peninga fyrir að drepa sódómista? Ég virðist ekkert ætla að venjast því hvað heimurinn er fucked up staður.

Svo virðist allt vera að fara fjandans til hérna á íslandi líka og mér finnst eins og við séum bara á leið í moldarkofana aftur...að minsnta kosti vorum við einu sinni nútímaþjóðfélag en miðað við fréttir seinustu daga og vikur erum við bara að verða að einhverju bananalýðveldi aftur. Verðbólgan í hámarki, fasteignamarkaðurinn á barmi þess að hrynja og yngri helmingur þjóðarinnar (including me) að fara að sitja uppi með milljóna skuldir umfram eignir, Pólverjar búandi við aðstæður sem væru ekki hundum sæmandi og látnir borga fyrir það himinháar fjárhæðir, businesskallar að kaupa upp lönd og hrella sumarhúsaeigendur á máta sem mér finnst eiga heima í íslendingasögunum, lóðaúthlutanir á höfuðborgarsvæðinu virðast líka virka eftir einhverju forsögulegu klíkuskapskerfi, álver skulu rísa út um allt hvað sem hverjum finnst en stjórnvöld eru nú samt ekki með neina stóriðjustefnu að eigin sögn og þetta er bara allt í volli.

Ef ég bæti svo ofan á þetta eigin tilvistarkreppu sem hefur aðallega með það að gera að ég er búin að sóa seinustu 5 árum af lífi mínu í að reyna að ná í einhverja BS-gráðu í fagi sem ég hef ekki nokkurn minnsta áhuga á  og ég veit ekkert hvað ég vil gera við restina af lífinu finnst mér bara ærin ástæða til að fara að grenja.

Hvernig fer maður að því að laga heiminn og eigið líf?

Mótmæli gegn hátíð samkynhneigðra í Jerúsalem

Kínverjar á tunglinu, lýðræði vs. einræði og persónuleg vitundarvakning

Jesús Pétur og Santa María! Hvaða voðalega pissukeppni er þetta hjá þessum þjóðarleiðtogum alltaf hreint? Hvað ætla þeir að græða á þessum tunglferðum? Og so sorry, en mér finnst bara ekkert merkilegt að vera þriðja þjóðin til að senda mann út í geim. Ef ég er ekki orðin bara snargeðveik og farin að ímynda mér hluti, þá var ég í Kína fyrir 2 árum eða svo og þá sýndist mér nú vera alveg fullt af þarfari málaflokkum fyrir þá að setja þennan efnahagslega styrk sinn í. Já ég segi það og skrifa, heimurinn væri betri ef ég væri einræðisherra yfir honum öllum.

Og talandi um einræðisherra....Það var vinnuskvísupottapartí fyrir 2 helgum síðan og eftir nokkra bjóra og nokkur kampavínsglös var ég búin að finna skoðanasystur í pottinum sem var sem sagt sammála mér í því að þetta lýðræði sem við búum við og verið er að reyna að fá allan heiminn til að taka upp sé ekki nógu sniðugt kerfi af hinum ýmsustu ástæðum, og að menntað einræði væri bara miklu sniðugri kostur. Við erum að vísu ekki búnar að finna neina praktíska útfærslu á ýmsum smáatriðum eins og hvernig skuli velja góða einræðisherra eða hvernig eigi að passa upp á að þeir verði ekki bara tjúllaðir af öllum völdunum með tímanum og hætti að vera góðir einræðisherrar. En við vorum komnar með þá bráðabirgðalausn að sjá bara um þetta sjálfar, eða hún mátti vera einræðisherra og ég sérstakur ráðgjafi. Eitt af okkar fyrstu verkum átti að vera að hækka bensínverð um ein 400% (en bæta að sjálfsögðu um leið almenningssamgangnakerfið verulega) þar sem svona "smáhækkanir" eins og hafa orðið nýlega virðast ekkert draga úr notkun einkabílsins.

Þetta eru auðvitað engar stórfréttir, bara pólitískt fyllerísbull (með miklu sannleiksívafi þó) í heitum potti - en einhver áhrif hafði þetta þó á mig því síðan þá er ég bara ekki búin að hreyfa bílinn nema ég sé að fara eitthvað sem er engan vegin í göngufjarlægð (nema reyndar einu sinni þegar ég var að fara að kaupa áfengi í massavís - ein 10 kg eða svo, 1,5 km í burtu og var á hraðferð, þá keyrði ég). Á þessum tíma er ég búin að fara þrisvar labbandi í bæinn, fjórum sinnum út á videoleigu og tvisvar í ljós. Allt ferðir sem ég hefði annars farið keyrandi-bara af því maður er örlítið fljótari að því. Þó að þessar stuttu gönguferðir mínar geri kannski ekki gæfumuninn fyrir ósonlagið eða nærri uppþornaðar olíulindir heimsins, og jafnvel ekki mikið fyrir mína persónulega bensíneyðslu, þá er það góð tilfinning að vera að fara eftir því sjálfur sem manni finnst og predikar að allir eigi að gera.

Kínverjar ætla að senda mann til tunglsins

Ítalir og fallegar sálir?

Auðvitað voru Roger Waters tónleikarnir í gær geðveikir en ég held samt að ég hefði fengið mun meira út úr þeim með miða á A-svæði. Ítalinn hagaði sér líka skikkanlega og fór í ofanálag snemma og beið frammi eftir að þetta yrði búið – honum fannst svo heitt og tónlistin svo hávær (vorum samt eiginlega alveg aftast og ekkert stappað af fólki í kringum okkur). Svo kom nú á daginn eftirá að hann fílar ekkert Pink Floyd – dýrt spaug það myndi ég segja. 

Og hvernig er það? Þekkir einhver Ítali svona almennilega sem hóp? Eru þeir allir fucked up í hausnum eða er það bara þessi eini. Hann vildi meina að ég ætti að bjóða stærðfræðikennaranum í mat og þá fengi ég að ná prófinu. Sagði að svoleiðis virkaði það á Ítalíu og að þess vegna ættu prófessorarnir aldrei í vandræðum með að ná sér í flottar ungar stelpur. Ég reyndar hallast frekar að því að þessi sé í það minnsta meira fucked up í hausnum en hinn almenni Ítali. 

Hitti svo vin minn og skutlaði honum og vinkonu hans heim eftir tónleikana. Hafði aldrei hitt hana áður en komst að því í bílnum að hún býr til stjörnukort og er svona með áhuga á þeim málum, sem mér finnst oftast óttalegt bull. Svo sagði hún við mig þegar hún var að fara út úr bílnum að ég væri falleg sál, hún sæi það sko alveg. Merkilegt hvað mér fannst vænt um það hrós miðað við hvað mér finnst svona dót vera mikið bull og hún þekkti mig ekki neitt. Held að niðurstaðan sé að mér finnist það ekkert vera bull nema rétt svona opinberlega til að virka vísindalega þenkjandi.